讀日文嗰時，總係覺得日本文化入面嘅「內」同「外」好煩好難分，但後來細心諗，香港人都係非常擅長公私分明嘅民族，至少在「書寫」呢件事上面一定係。唔係咩？

其實粵文大家平時都睇唔少，只不過大多都剩係喺網上呢啲普遍主流認為係通俗啲嘅平台，例如網絡作家定期出嘅 status 社論、散文，又或者係網絡章回小說等等，特點都係通順、快，兼且擲地有聲，曝光率勁高嘅「是咁的」「無人講」「又唔叫」之類嘅潮語抵食又入屋，傳播速度快過俾錢落ad，正因為粵語本身就係大家日常溝通嘅語言，於是就同網絡急速又碎片化嘅資訊交流一拍即合。

有時 Social media 同時彈兩篇文出嚟，一篇用口語寫，另一篇用書面語寫到文縐縐，可能大部份人都會揀咗最容上手（入口）嗰篇望下，睇下係咩料先。

另一個成日都見到粵文嘅地方，就係舊港產片嘅字幕喇。周星馳大家都滾瓜爛熟啦？其實入面嘅字幕都盡量用返最貼近原句嘅粵文，可以話係我哋由細到大最潛移默化噉學啲廣東話 slang 點寫嘅地方。

不過可能呢啲粵文，都未去到最精煉，甚或有時都唔肯定粵文噉寫啱唔啱？《迴響》呢本粵文誌，就有專責編輯去審稿，Fact check / Format check 返粵文嘅規範，有通用字表統一返常用字詞，亦會以香港日常語境嚟做重心（廣東話都地域性差異）。簡單啲講，就係一本香港人一定噏得出，但就未必個個都一下子睇得明嘅粵語文學誌。

讀者會上，好大嘅篇幅都落咗係到底粵文有咩規範，點分對與錯？總編指出，其實坊間都有愈來愈有人重視正寫粵文，所以先會有「吾你老母」「笑左，咁有無笑埋右？」之類的猛力矯正，正正係因為大家都重視粵文嘅正統性，正音正字，用啱同用錯，仿佛就係MK同PK嘅分別。

至於港人極為 Common 嘅中英夾雜現象，總編覺得都係粵文嘅一部份嚟，尤其係因為佢留意到好多粵語入面夾雜嘅英文單詞，都唔係真係英文，而係挪用咗一個用字母構成嘅字，脫離英語文法咁樣塞落去粵語入面當外來語咁用。

例如佢話好多人都會講「呢個人好 Charm.」嗱就咁嘅，Charm字本來係Noun名詞，但在粵語入面就當咗係一個 Adj 形容詞咁用；之前港台節目中有個女仔話「劉鳴煒個 Package 好好」，總編就笑指， Package 呢個英文單詞，若然用在男性身上，主要係用嚟講佢嘅性器官。稽查返劍橋字典，原來更帶有 offensive 意味，鬼佬聽到可能真係一舊雲。

但 Package 放在香港話（粵語）入面，唔單止廣泛被大眾所理解同接受，依家更近乎成為咗一個 Social norm：用 Package 嚟概括一個人嘅整體經濟條件，加上媒體、影視作品日用夜用，大家已經一講就明。

另外，同場《迴響》作者之一的陳美濤就提出一個幾有趣嘅個案，佢過往寫粵文一直都係用個「咁」字，但《迴響》嘅 House Style 就統一寫成「噉」，若果單講香港語境的流通度，「咁」幾乎大熱跑出，唔通我哋一路都搭錯線？

之但係總編就話，「噉」（gam2）同「咁」（gam3）分別係兩隻字嚟，發音唔同，無論係文法、使用方式同意思都大不同。唔明？總編就用日常例句嚟解釋兩者差異：「叻？你指幾叻？」「咪好似隔離屋個女噉咁叻囉！」OK，即刻明曬。

類似嘅個案不計其數，有時又唔洗點樣去專登去學，事關大家識中文，睇得多就會明。就好似席間有觀眾問，怕唔怕台灣讀者睇唔明，得香港人孤芳自賞。

呢個亦都係筆者我嘅顧慮之一，尤其係社運爆發期間，好多文宣都有加入國際戰線通用性嘅考量，盡量用返曬書面語，等台灣朋友都睇得明，即時緊貼最新形勢，無疑是個 Marketing 手段，推動文學都係咁話。

不過，總編自己就覺得大家唔好睇小華語圈用家嘅理解能力，佢認為只要嗰個人識中文，你俾足夠嘅時間佢睇，就算成篇都係粵文，佢都一定會明到八、九成。

佢甚至覺得《迴響》日後可能打嘅唔單止係香港市場，更會吸納埋海外粵語圈用家，射到去馬來西亞、新加坡、越南、美國同加拿大等地，某程度上，都可以話係一種文化的跨區連結，唔同地方用法又香港人有乜唔同呢？其實又可以進一步交流切磋，做到嘅話都咪話唔好玩。

講咗咁多，其實都係想將呢個小眾讀者會嘅精華內容寫出嚟，順便推廣下呢本係紙媒寒冬下出世的《迴響》粵語文學誌。其實粵文唔係啲咩新潮嘢，真係「自古而來」就有，中意考究嘅不妨睇下香港人編制嘅《粵典》，呢本 Crowdsource 而生嘅粵語辭典可以教曉大家口語點寫之外，更重要嘅係佢個 data base 會 Keep 住更新，而且唔講唯一、唔講權威，反而好貼地噉從社會中真實嘅語言現狀中著手研究。

有人用，多人用，依家都仲有人用，曾幾何時好多人用，都會記錄在案，方便大家搞清楚自己語言同文化嘅來龍去脈，日後亂噏都有個譜。

唔想太學術嘅，咪即管試下自己支筆，睇下自己有無辦法一股作氣寫成篇粵文出嚟？呢樣嘢對於寫慣寫熟嘅人嚟講，可能有啲似反手打波噉，要重新適應下喇。

之不過學總編山城豬伯話齋，歷來用到白話文（又或係其他新興語系）寫字嘅人，文筆同語言能力都比較好，唔係點我手寫我心又寫得靚先？你估真係成篇啲「的」轉「嘅」、「他」轉「佢」就收工咩？哈。