2017年3月，雜誌社要做一本環保專號，我負責電影版，揀選了齊柏林的《看見台灣》，那時他健在，而我第一次透過他的作品讀到「美麗與哀愁」這一句。

未試過親身踏足，真的不會意識到這句話的份量。

上週第一次登上雞公嶺，由四月開始就在農田遙望，昨日終於見到頂上風光，同時心情亦相當複雜。

除了山火，山坡上一道道令人覺得「好似去咗南美」的貧瘠沙路，原來都是越野單車刨出來的。以為不會見到，誰知走到中途便從遠處看到一隊隊車隊揚長而去，那引擎聲音，那機械車輪的重，本應不屬於這兒的。

下山時，道路又窄又滑，走到一半，後面竟又有2-3個車手塞在道上，等我們讓出道路畀佢哋衝落去，我們習慣性地，讓快的先走，狼狽地踩入草叢，讓一架兩架三架重車越過。

「這合法的嗎？」我問。「不合呀，但你點捉？」文西答。「噉即係所有非法都係以捉到為前提，捉唔到就等同無嘢。」

有山野團隊紀錄雞公嶺近年的地貌變化，原本翠綠的山林，現在漸漸「脫髮」，一道道刨出來的赤道像指甲痕，很痛。

春風吹又生，這句話可能未必能應用到落山頭。一是樹木生長需要經年累月，二是貧瘠化令泥土鬆散，大風一吹便散，雨水又會令水土流失，新生植物更難札根。三，自然是人來人往，山根本沒有喘息的機會，恢復追不上創傷。

本地遊興咗成年，作為從業者，一直都不忘在推廣景點之餘，亦唔好忘記推廣埋「禮儀」。講鄉村，講原居民，我會提醒大家低調拜訪，安靜、平和。打下招呼，問候一下。

睇古蹟，可以的話盡量唔好「打卡」，做起了，人人問係邊，帶曬gear去影 Product shot，變成一個免洗攝影棚，好快無命。

不少廢墟近年都成為影視作品場景，有個現象是拍攝道具都會留在現場，又有人手多拎走啲嘢，加下減下，久而久之就場面全非。

仲有好多好多，一講可能又變「左膠」、「道德偉」。但正因為政府唔會點做，民眾都唔醒覺，香港無嘢可以留畀下一代，除了一片貧瘠，一片狼藉。